Նորություններ

Լրատվություն

Սուրեն Պապիկյանն ընդունել է Լիոնի քաղաքապետի առաջին տեղակալ Ժորժ Կեպենեկյանին

25.04.2019

ՀՀ տարածքային կառավարման և զարգացման նախարար Սուրեն Պապիկյանն այսօր հյուրընկալել է Հայաստանի Հանրապետությունում Ֆրանսիայի դեսպան Ժոնաթան Լաքոթի գլխավորած պատվիրակությանը, որի կազմում էին Լիոնի քաղաքապետի առաջին տեղակալ Ժորժ Կեպենեկյանը, Լիոնի մետրոպոլի և քաղաքապետարանի հայաստանյան ծրագրերի ղեկավար Իզաբել լա Գյուլը և այլ պաշտոնատար անձինք։

Ջերմորեն ողջունելով պատվիրակության անդամներին՝ նախարար Պապիկյանը բարձր է գնահատել դարավոր բարեկամության և փոխադարձ հարգանքի վրա հիմնված հայ-ֆրանսիական հարաբերությունների ներկա մակարդակը և ընդգծել միջպետական ու միջտարածաշրջանային հարթություններում ապակենտրոնացված փոխգործակցության ներկապնակն առավել հարստացնելու ուղղությամբ լրացուցիչ ջանքեր գործադրելու անհրաժեշտությունը։ Նախարարն արդյունավետ է բնորոշել Հայաստանի և Ֆրանսիայի շուրջ երկու տասնյակից ավելի քույր քաղաքների միջև տարբեր ոլորտներում առկա գործակցությունը, որի գործնական վկայությունն, ըստ նրա, բոլորովին վերջերս Էջմիածնի և Իսի լե Մուլինոյի միջև ստորագրված «խելացի քաղաքների» վերաբերյալ համագործակցության պայմանագիրն էր։

Դեսպան Ժոնաթան Լաքոթը շնորհակալություն է հայտնել նախարարին ընդունելության համար և նշել, որ ապակենտրոնացված համագործակցությունը երկու երկրների միջև խորացող հարաբերությունների կարևորագույն բաղադրիչներից է։

Լիոնի քաղաքապետի առաջին տեղակալ Ժորժ Կեպենեկյանը ևս շնորհակալություն է հայտնել հյուրընկալության համար և նկատել, որ ժողովրդավարության ուղղությամբ Հայաստանում արձանագրված դրական տեղաշարժերը հայ-ֆրանսիական հարաբերությունների վերբեռնման և դրանք որակապես նոր հիմքերի վրա դնելու հիանալի հնարավորություններ են ընձեռնում։ Փոխքաղաքապետը նաև համոզմունք է հայտնել, որ աշնանը Լիոնում կայանալիք Հայ-ֆրանսիական ապակենտրոնացված համագործակցության 4-րդ համաժողովը երկու պետությունների վարչատարածքային միավորումների համար նույն հաճախականությամբ խոսելու և գործելու յուրօրինակ հարթակ կդառնա։

Նախարար Պապիկյանը ողջունել է երկկողմ հարաբերությունները նոր փուլ թևակոխելու վերաբերյալ զրուցակցի մոտեցումները և շեշտել, որ բովանդակային նոր հիմքերի վրա խարսխված գործնական կապերն ու ֆրանսիական հաջողված փորձի տեղայնացումը մեծապես կնպաստեն Հայաստանի համայնքների կարողությունների հզորացմանը։ Այս տեսանկյունից նախարարն առանցքային է համարել նաև փոխշահավետ բիզնես միջավայրի ձևավորումն ու վստահելի գործընկերային հարաբերությունների կառուցումը։ Հյուրերին ներկայացնելով Հայաստանում իրականացվող վարչատարածքային բարեփոխումների ընթացքը՝ Սուրեն Պապիկյանն արձանագրել է. «Մեզ համար առաջնահերթ է ժողովրդավարության արմատները դնել հենց համայնքներում։ Մենք ձգտում ենք հավասարակշռության գործուն մեխանիզմ ապահովել համայնքի ավագանու և ղեկավարի միջև՝ նպատակ ունենալով խուսափել տեղերում գերանձնավորված իշխանությունից»։

 

← Վերադառնալ ցուցակին

Թեժ գիծ

Հեղինե Ալեքսանյան` Աշխատակազմի քարտուղարության ընդհանուր բաժնի առաջատար մասնագետ: Հեռ (010)-51-13-62 ---------------------------------------------------- Մաքուր Հայաստան ծրագրի հարցերով կարող եք զանգահարել Հեռ (010)-51-13-98

Բաժանորդագրում նորություններին