ՀՀ ՏԿԵ նախարարի տեղակալ Վաչե Տերտերյանը ընդունել է ՀՀ-ում Ֆինլանդիայի Հանրապետության դեսպան Կիրթսի Նարինենին

ՀՀ Տարածքային կառավարման և ենթակառուցվածքների նախարարի տեղակալ Վաչե Տերտերյանը ընդունել է ՀՀ-ում Ֆինլանդիայի Հանրապետության դեսպան Կիրթսի Նարինենի գլխավորած պատվիրակությանը։ 

Նախարարի տեղակալը ողջունել է հյուրերին և ներկայացրել նախարարության գործունեության հիմնական շրջանակը, ոլորտային ձեռքբերումները, ինչպես նաև զարգացման տեսլականները։ Անդրադառնալով տեղական ինքնակառավարման համակարգին՝ նախարարի տեղակալը նշել է, որ վերջին տարիներին համակարգային բարեփոխումները գրանցել են դրական արդյունքներ և ներկայացրել համայնքներում գործող Քաղաքացիների սպասարկման գրասենյակների(ՔՍԳ) հիմնական գործառույթները։ 

Կիրթսի Նարինենը, խոսելով հայ-ֆիննական հարաբերությունների կարևորության մասին, նշել է որ համագործակցության հիմնական թիրախը տարածաշրջանային զարգացումն է, ուստի ֆիննական կողմը ցանկանում է մի շարք ծրագրեր իրականացնել Երևանից դուրս՝ հատկապես Սյունիքի, Տավուշի, Շիրակի և Լոռու մարզերում։ Ծրագրերը կուղղվեն կառավարման համակարգում և համայնքների ակտիվությանը կանանց ներգրավվածությանը, մեդիագրագիտության և ապատեղեկատվության դեմ պայքարին, կստեղծվեն 80 աղջիկների ֆուտբոլային թիմեր։ 

Հանդիպման երկրորդ հատվածում կողմերը խոսել են ջրային ռեսուրսների կառավարման և ջրային դիվանագիտության կարևորության մասին։ Վաչե Տերտերյանը ներկայացրել է ջրային ոլորտում Հայաստանի համագործակցային փորձը հարևան երկրների՝ Վրաստանի, Իրանի և Թուրքիայի հետ, ներկայումս իրականացվող ծրագրերը և հեռանկարները, ինչպես նաև ջրային ռեսուրսների հիմնական կառավարիչ Ջրային կոմիտեի գործառույթները։ Դեսպանը նշել է, որ նպատակ ունենալով ջրային համագործակցությունը և անվտանգությունը դարձնել խաղաղության գրավական՝ Երևան են ժամանել միջազգային ջրային անվտանգության 20 փորձագետներ, որոնք համատեղ ռազմավարության մշակումից հետո կհանդիպեն հայ գործընկերներին։ 

Հանդիպման ավարտին կողմերը պատրաստակամություն են հայտնել խթանել երկկողմ հարաբերությունները։