«Աջակցություն Հայաստանում ապակենտրոնացման և տեղական ինքնակառավարման բարեփոխումներին» ծրագրի շրջանակներում ՀՀ ՏԿԵ նախարարին տեղակալն ու ՏԻՔ վարչության պետը Շվեդիայի Թագավորությունում են

2023թ. մայիսի 29-ից հունիսի 1-ը «Աջակցություն Հայաստանում ապակենտրոնացմանն ու տեղական ինքնակառավարման բարեփոխումներին» ծրագրի «DeaLoG» նախագծի շրջանակներում ՀՀ պատվիրակությունը, որի կազմում են Տարածքային կառավարման և ենթակառուցվածքների նախարարության, ՀՀ ֆինանսների նախարարության, ՀՀ Ազգային ժողովի, ՀՀ Կրթության, գիտության, մշակույթի և սպորտի նախարարության, ՀՀ փոխվարչապետ Մ. Գրիգորյանի գրասենյակը, գտնվում է Ստոկհոլմում՝ ճանաչողական աշխատանքային այցի նպատակով: Այցի շրջանակներում փոխըմբռնման երկու հուշագիր է ստորագրվել ՀՀ Տարածքային կառավարման եւ ենթակառուցվածքների նախարարության, ՀՀ ֆինանսների նախարարության, Շվեդիայի տեղական իշխանությունների և տարածաշրջանների ասոցիացիայի (SALAR) և «ՍԱԼԱՐ Ինտերնեշնլ» ընկերության միջեւ: 

ԴեաԼոԳ-ը Շվեդիայի տեղական իշխանությունների և տարածաշրջանների շվեդական ասոցիացիայի (ՍԱԼԱՐ) ծրագիրն է, որն իրականացվում է վերջինիս դուստր ընկերության՝ ՍԱԼԱՐ Ինթերնեշնլի կողմից, 2022 թվականի սեպտեմբերից ի վեր և նպատակ ունի աջակցել Հայաստանի Հանրապետության կառավարությանն ապակենտրոնացման բարեփոխումների իրականացման և տեղական ինքնակառավարման մարմինների հզորացման գործում` հիմնվելով տեղական ինքնակառավարման շվեդական և եվրոպական այլ երկրների երկարատև և հարուստ փորձի վրա: ԴեաԼոԳ ծրագիրը ֆինանսավորվում է Շվեդիայի միջազգային զարգացման համագործակցության գործակալության (Սիդա) կողմից՝ Արեւելյան Եվրոպայի գործընկերության շրջանակներում բարեփոխումների համագործակցության ներկայիս շվեդական ռազմավարության շրջանակներում: ԴեաԼոԳ ծրագիրը հանդիսանում է նաև «Resilient Syunik Team Europe» նախաձեռնության մի մասը, որը ԵՄ, Եվրոպական ներդրումային բանկի և ԵՄ անդամ երկրների՝ Ավստրիայի, Ֆրանսիայի, Գերմանիայի, Լեհաստանի եւ Շվեդիայի համատեղ ձեռնարկումն է, որին Շվեյցարիան նույնպես միացել է որպես արտաքին գործընկեր: 

Ընդհանուր առմամբ, այցի ընթացքում պատվիրակությունը կուսումնասիրի և կփոխանակի մտքեր այնպիսի թեմաների շուրջ, ինչպիսիք են քաղաքական, վարչական և հարկաբյուջետային ապակենտրոնացումy և պատասխանատվության բաշխում իշխանության տարբեր շերտերի ներսում և միջև, Շվեդիայի տեղական ինքնակառավարման մարմինների դերն ու տեղը ընդհանուր պետական կառավարման և ծառայությունների մատուցման գործընթացներում, տեղական ինքնակառավարման եվրոպական խարտիայի սկզբունքները գործնականում, վստահությունը, հաշվետվողականությունը և վերահսկողությունը կառավարության տարբեր շերտերի ներսում և միջև, հարկաբյուջետային ապակենտրոնացումը՝ ներառյալ եկամուտների բաշխումը (բացատրելով PIT-ն) և համահարթեցման համակարգը, ուժեղ հարկաբյուջետային բազա և տնօրինվող եկամուտներ ունեցող համայնքների օգուտները՝ հատկապես տնտեսական զարգացման համար, փաստերի վրա հիմնված քաղաքականության ձևակերպումը, ապակենտրոնացմանն առնչվող առանցքային ոլորտների պլանավորումը և այլն: