Համայնքներում շարունակվում են մասնակցային բյուջետավորմամբ ձևավորվող փորձնական ծրագրերի իրականացման աշխատանքները
Համայնքներում շարունակվում են մասնակցային բյուջետավորմամբ ձևավորվող փորձնական ծրագրերի իրականացման աշխատանքները։ Դրանց սահուն ընթացքն ապահովելու նպատակով՝ ՀՀ Արմավիրի մարզի Արմավիր, ՀՀ Արագածոտնի մարզի Աշտարակ, ՀՀ Վայոց ձորի մարզի Ջերմուկ և ՀՀ Կոտայքի մարզի Աբովյան համայնքներում 2024թ․ հունվարի 26-ին, փետրվարի 1-ին, 8-ին, 20-ին, 21-ին և 26-ին ՀՀ ՏԿԵՆ ֆինանսական, հաշվապահական հաշվառման և համայնքային բյուջեների վարչության համայնքային բյուջեների բաժնի պետ Լորիս Մուրադյանը և ՀՀ ֆինանսների նախարարության գործընկերները մասնակցել են վերոնշյալ համայնքներում մասնակցային բյուջետավորման գործընթացի շրջանակներում սուբվենցիոն ծրագրերի իրականացման համար քաղաքացիների կողմից ներկայացված առաջարկ-նախագծերի առնչությամբ կազմակերպված հանրային քննարկումներին:
Հանդիպումներին ներկա էին մասնակցային բյուջետավորման գործընթացի կառավարումն ապահովող հանձնաժողովը, ավագանու անդամներ, առաջարկ-նախագծեր ներկայացրած քաղաքացիներ, համայնքների ակտիվ բնակիչներ և հասարակական կազմակերպությունների ներկայացուցիչներ։ Արմավիրում հանրային քննարկմանն առցանց էլեկտրոնային հարթակի միջոցով միացել էին նաև ՌԴ ֆինանսների նախարարության Ֆինանսական գիտահետազոտական ինստիտուտի (НИФИ) փորձագետները` ներկայացնելով միջազգային պրակտիկայում մասնակցային բյուջետավորման ընթացակարգերին առնչվող փորձը: Ռուս փորձագետների հետ քննարկվեց նաև մասնակցային բյուջետավորման գործընթացի արդյունավետությունը, առավելությունները, ծրագրի իրականացման ընթացքում հնարավոր խնդիրները, կազմակերպվեց արդյունավետ խորհրդատվություն:
Հանրային քննարկմանը ծրագրային առաջարկների հեղինակ համայնքի բնակիչները ներկայացրեցին իրենց նախագծերը, դրանց նպատակը, կարևորությունը, ակնկալվող արդյունքները: Ներկայացված առաջարկ-նախագծերը վերաբերում էին ժամանցային, ոռոգման համակարգի կառուցման, ճանապարհաշինության և այլ ոլորտներին: Ծրագերի իրականցումն ապահովելու վերաբերյալ տեղի ունեցան բովանդակային քննարկումներ և խորհրդատվություններ։ Սահմանված չափանիշներին համապատասխանող և հանրային քննարկում անցած բոլոր ծրագրերը հրապարակվում են համայնքապետարանների կայքէջերում և ենթակա են քվեարկության սահմանված ժամանակահատվածում:
Անհրաժեշտ է նաև նշել, որ ՀՀ համայնքներում մասնակցային բյուջետավորման գործընթացի խթանման նպատակով ՀՀ 2024թ․ պետական բյուջեով վերոգրյալ համայնքների համար նախատեսվել է 500 մլն դրամ, որի տրամադրումը մասնակցային ընթացակարգերով իրականացնելու նպատակով ՀՀ կառավարությունը 2023թ. նոյեմբերի 2-ին ընդունել է «ՀՀ համայնքներում մասնակցային բյուջետավորմամբ ձևավորված ծրագրերի իրականացման նպատակով ՀՀ 2024 թվականի պետական բյուջեից համայնքներին սուբվենցիաների տրամադրման կարգը հաստատելու մասին» N 1890-Ն որոշումը։