Հանդիսավոր կերպով նշվել է Տեղական ինքնակառավարման համակարգի 28-ամյակը

Այսօր հանդիսավոր կերպով նշվեց Տեղական ինքնակառավարման համակարգի 28-ամյակը։ Միջոցառմանը ներկա էին ՀՀ վարչապետ Նիկոլ Փաշինյանը, փոխվարչապետ Տիգրան Խաչատրյանը, Կառավարության մի շարք անդամներ, այլ պետական պաշտոնյաներ, ՀՀ տասը մարզպետները և բոլոր համայքապետերը, ԵՄ դեսպան Վասիլիս Մարագոսը, ԵԽ հայաստանյան գրասենյակի ղեկավար Մաքսիմ Լոնգանգեն, միջազգային և հասարակական կազմակերպությունների մի շարք ներկայացուցիչներ։ 

Միջոցառմանը բացման ելույթով հանդես է եկել ՀՀ տարածքային կառավարման և ենթակառուցվածքների նախարար Գնել Սանոսյանը։ Նախարարը նախ շնորհավորել է ներկաներին և խոսել ՏԻՄ համակարգի կայացման և առաջիկայում սպասվող անելիքների մասին․«Մենք շարունակելու ենք աշխատել համայնքային ունակությունները բարելավելու, կարողությունները հզորացնելու ուղղությամբ: Ներդրվում են նորարարական ծրագրեր, տեղեկատվական ժամանակակից տեխնոլոգիաներ, մշտական աշխատանք է տարվոււմ կառավարման էլեկտրոնային համակարգերի կիրառության ընդլայնման ուղղությամբ, ինչը կապահովի ՏԻՄ-երի կողմից մատուցող հանրային ծառայությունների որակի բարելավում և հասանելիության ընդլայնում»,-նշել է Սանոսյանը։ 

Տեսաուղերձով ներկաներին է դիմել նաև Եվրոպայի խորհրդի Տեղական և տարածքային իշխանությունների կոնգրեսի գլխավոր քարտուղար Մաթյո Մորին։ Նա մասնավորապես խոսել է Հայաստանում ժողովրդավարության կայացման կարևորության մասին․«Այսօրվա առիթով մենք պետք է ողջունենք այն նշանակալի ջանքերը, որ Հայաստանը ներդրել է Տեղական ինքնակառավարման կայացած համակարգ ունենալու գործում։ Հայաստանի հանձնառությունը ժողովրդավարության և լավ կառավարումը խթանելու գործում ոգևորիչ է, ինչն արտացոլված է 2001 թվականին Եվրոպայի խորհրդին անդամակցելու Ձեր որոշման մեջ», -ասել է Մորին։ 

Ողջույնի խոսքով հանդես է եկել նաև ամենամեծ համայնքի՝ Երևանի քաղաքապետ Տիգրան Ավինյանը։ Երևանի քաղաքապետը նշել է, որ հաջողությամբ ինքնակառավարվելու համար մենք պետք է ունենանք բավարար ներուժ և կարողություններ՝ արդյունավետորեն օգտագործելու մեր ռեսուրսները և արձագանքելու նոր մարտահրավերներին․«Սա ենթադրում է շարունակական կրթություն, վերապատրաստում, ժամանակակից գործիքներ ու մեթոդներ, ինչպիսին է արհեստական բանականության հետ գրագետ աշխատանքը, ինչը կարող է փոխարինել 100-ավոր խորհրդակցությունների ժամեր: Այս ամենն է, որ թույլ կտա իրականացնել արդյունավետ կառավարում»,-ընդգծել է Ավինյանը։

 Եզրափակիչ ելույթով հանդես է եկել ՀՀ վարչապետ Նիկոլ Փաշինյանը։ Վարչապետն իր հերթին արձանագրել է, որ Տեղական ինքնակառավարման համակարգը կայացած է, բայց դեռ շատ անելիքներ կան։ Փաշինյանը կարևորել է ազգային փոքրամասնություններով բնակեցված համայնքների հարցը, որոնք չմիավորման պարագայում դուրս են մնում համաչափ զարգացումից, սահմանափակ բյուջեի պարագայում չեն կարողանում խոշոր ծրագրեր իրականացնել։ Վարչապետը կարևորել է նաև տեղական ինքնակառավարման մարմիններում բարեփոխումների օրակարգի շարունակականությունը սոցիալ-հոգեբանական իմաստով․ «Քաղաքացին պետք է ճանաչի այն մեխանիզմները, որի գործարկման միջոցով տեղի են ունենում կամ տեղի չեն ունենում այն փոփոխությունները, որոնք ինքն ակնկալում է»,- ասել է Վարչապետը և ընդգծել համայնքի բնակիչների համար «համայնք» հասկացությունն ավելի պարզ և ընկալելի դարձնելու կարևորությունը։ 

Ըստ Վարչապետի՝ և՛ «համայնք», և՛ «պետություն» հասկացությունները կոլեկտիվ ջանքի արդյունքում կյանքը բարելավելու գործիքներ են․ «Այս համատեքստում, շատ է խոսվում ապակենտրոնացման մասին, մեծ հաշվով՝ խոսքը լիազորությունների և իշխանության ապակենտրոնացման մասին է: Եվ քաղաքական իմաստով պետք է արձանագրենք, որ մենք այդ որոշումը՝ ամենակարևոր որոշումներից մեկը, որն իմիջիայլոց դե ֆակտո որոշում է, կայացրել ենք, և այդ որոշումը հետևյալն է, որ առաջինը՝ դե յուրե որոշումը, որ համամասնական ընտրակարգով է տեղի ունենում տեղական ինքնակառավարման մարմինների ընտրությունները, և երկրորդը՝ դե ֆակտո ընտրությունները չեն կեղծվում, և քաղաքացիները ոչ միայն դե յուրե, այլև դե ֆակտո ընտրում են իրենց համայնքը, իրենց ավագանուն»,- նշել է Նիկոլ Փաշինյանը: 

Միջոցառման ավարտին մի շարք համայնքներ տարբեր անվանակարգերում խրախուսվել են ՀՀ ՏԿԵ նախարարի շնորհակալագրով։