ՀՀ ՏԿԵ նախարարի տեղակալ Վաչե Տերտերյանն ընդունել է Զարգացման ֆրանսիական գործակալության պատվիրակությանը
ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանն ընդունել է Զարգացման ֆրանսիական գործակալության (ԶՖԳ) պատվիրակությանը՝ ԶՖԳ քաղաքաշինության աշխատանքային խմբի ղեկավար Կարինե Ֆրուինի գլխավորությամբ:
ՀՀ ՏԿԵ նախարարի տեղակալը, խոսելով նախարարության ռազմավարության մասին, առանձնացրել է օրակարգային մի շարք հարցեր, որոնց մեջ են համայնքների միավորման, լիազորությունների ապակենտրոնացման գործընթացները, քաղաքաշինական խնդիրները, «խելացի քաղաքների» ժամանակակից տեխնոլոգիական տեսլականը, ջրային ոլորտի զարգացումը։
Հանրապետությունում աղբահանության պատշաճ կազմակերպման անհրաժեշտությունն ընդգծելով՝ շեշտվել է տվյալների բազայի ներդրման կարևորությունը, որն էապես կնպաստի գործընթացի արդյունավետ կազմակերպմանը, ինչպես նաև կենսաքայքայվող թափոնների հավաքման ու վերամշակման համար անհրաժեշտ մեխանիզմների ներդնումը։
Հանդիպման ժամանակ կարևորվել է նաև աղբահանության և կոշտ թափոնների կառավարման ոլորտում համայնքների կարողությունների զարգացմանն ուղղված գործընթացները, հաշվի առնելով, որ համաձայն «Աղբահանության և սանիտարական մաքրման մասին» ՀՀ օրենքում կատարված փոփոխությունների՝ պարտադիր պահանջ է հանդիսանում ՀՀ համայնքներում աղբահանության և կոշտ թափոնների կառավարման պլանների մշակումը, որոնք պետք է ներառվեն համայնքի 5-ամյա զարգացման ծրագրի և տարեկան աշխատանքային պլաններում։
Զարգացման ֆրանսիական գործակալության (ԶՖԳ) պատվիրակության ներկայացուցիչներն իրենց պատրաստակամությունն են հայտնել ծրագրերի իրականացման աջակցության հարցում։ Հանդիպման ավարտին կողմերը պայմանավորվածություն են ձեռք բերել հետագա համագործակցության հարցում։