ՀՀ մարզերում ամփոփվել են «ԵՄ-ն հանուն Հայաստանի համայնքներում էներգաարդյունավետության և վերականգնվող էներգիայի» ծրագրի արդյունքները

Մարտի 26-ին հանդիսավոր միջոցառմամբ ամփոփվել են «ԵՄ-ն հանուն Հայաստանի համայնքներում էներգաարդյունավետության և վերականգնվող էներգիայի» ծրագրի արդյունքները: Ծրագիրը, որն իրականացրել է «Գերմանական միջազգային համագործակցության ընկերությունը» (GIZ), համաֆինանսավորվել է Եվրոպական միության և Գերմանիայի դաշնային հանրապետության տնտեսական համագործակցության և զարգացման նախարարության (BMZ) կողմից և մեկնարկել է 2023 թվականին: 

2,8 միլիոն եվրո ընդհանուր բյուջեով ծրագիրը Լոռու, Տավուշի, Շիրակի, Գեղարքունիքի և Սյունիքի մարզերի մի շարք համայնքներին և տնային տնտեսություններին ապահովել է էներգաարդյունավետության և վերականգնվող էներգիայի հնարավորությունների ավելի լավ հասանելիությամբ՝ նպաստելով գյուղական բնակչության էներգետիկ անվտանգության բարելավմանը և բնական պաշարների պահպանությանը: Ծրագրի շրջանակում 105 համայնքային և պետական կառույցներում իրականացվել են վերականգնվող էներգիայի և էներգաարդյունավետության միջոցառումներ՝ շահառու կառույցների կողմից համաֆինանսավորման սկզբունքով. 

• 101 շինությունում` մանկապարտեզներում, համայնքային կենտրոններում, մշակույթի տներում, բուժհաստատություններում և այլ կառույցներում տեղադրվել են 3-150 կՎտ հզորությամբ արևային կայաններ: Դրանց շարքում, 20-ից ավել շինություններում տեղադրվել են մեծածավալ՝ 15-60 կՎտ հզորությամբ արևային կայաններ, իսկ 150 կՎտ հզորությամբ կայաններ տեղադրվել են Սևան, Իջևան, Գավառ, Մարտունի բժշկական կենտրոններում: 

• Բազմաթիվ շինություններում տեղադրվել են արևային ջրատաքացուցիչներ, իրականացվել են էներգաարդյունավետության միջոցառումներ՝ տանիքների և նկուղների ջերմամեկուսացում, Էներգաարդյունավետ դռների և պատուհանների տեղադրում: 

Ծրագրի շրջանակում էներգաարդյունավետ վառարաններ են տրամադրվել 688 ընտանիքների. խոցելի տնային տնտեսություններին անվճար, իսկ այլ ցանկացողներին՝ համաֆինանսավորման սկզբունքով: 

Ծրագրով իրականացված միջոցառումների արդյունքում ածխաթթու գազի արտանետումները նվազել են տարեկան ավելի քան 2600 տոննայով։ Արդյունքում տարեկան կխնայվի ավելի քան 1350 մ³ վառելափայտ և կպահպանվի ավելի քան 10.5 հա անտառ: 

Իրականացվել են մետաղագործ վարպետների ուսուցումներ էներգաարդյունավետ վառարանների տեխնիկական և բիզնես հարցերի շուրջ, համայնքային ներկայացուցիչների ուսուցումներ կայուն էներգիայի, էներգախնայողության և բնության պահպանության, ինչպես նաև տեղադրված արևային կայանների շահագործման և սպասարկման թեմաներով: Բազմաթիվ համայնքներում իրականացվել են տեղեկատվական արշավներ՝ հանդիպումներ համայնքային աշխատակիցների հետ, իրազեկման միջոցառումներ և էքսպո ցուցահանդեսներ վերականգնվող էներգիայի և էներգաարդյունավետության վերաբերյալ։ 

Ողջույնի խոսքով հանդես են եկել ՀՀ տարածքային կառավարման և ենթակառուցվածքների նախարարության «Տեղական ինքնակառավարման քաղաքականության վարչության» պետ Աշոտ Գիլոյանը, Հայաստանում ԵՄ պատվիրակության տրանսպորտի, էներգիայի, շրջակա միջավայրի և կլիմայի հարցերով համագործակցության պատասխանատու Սոնիա Լոպես Լոպեսը և GIZ Հայաստանի ծրագրերի պորտֆոլիոյի ղեկավար Լետիցիա Կարնեվալին։

Ծրագրի մասին

«ԵՄ-ն հանուն Հայաստանի համայնքներում էներգաարդյունավետության և վերականգնվող էներգիայի» ծրագիրը «ԵՄ-ն հանուն էներգաարդյունավետության և շրջակա միջավայրի» ԵՄ գործողության և Գերմանիայի Դաշնային Հանրապետության տնտեսական համագործակցության և զարգացման նախարարության կողմից պատվիրակված և «Գերմանական միջազգային համագործակցության ընկերության» (GIZ) կողմից իրականացվող «Բնական պաշարների կառավարում և էկոհամակարգային ծառայությունների պահպանություն Հարավային Կովկասում գյուղական տարածքների կայուն զարգացման համար» (ԷԿՈսերվ) ծրագրի մաս է։ Ծրագիրը նպաստում է ԵՄ գործողության ընդհանուր նպատակին, այն է՝ բարելավել էներգաարդյունավետությունը և նպաստել շրջակա միջավայրի պահպանությանն ու կայունությանը:

Հարցերի դեպքում դիմել՝ 

hermine.hakobyan@giz.de 

041460378