Հանրային կապերի կարևորությունը ՏԻՄ-երում. ճգնաժամային հաղորդակցություն, հաջողության պատմություններ, սոցիալական մեդիա և քաղաքացիների մասնակցություն

Գերմանական միջազգային համագործակցության ընկերության (ԳՄՀԸ/GIZ) կողմից իրականացվող «Լավ կառավարում հանուն տեղական զարգացման Հարավային Կովկասում» ծրագիրը 2023թ. հուլիսի 18-21-ը իրականացրեց վերապատրաստումներ «Հանրային կապերի կարևորությունը ՏԻՄ-երում. ճգնաժամային հաղորդակցություն, հաջողության պատմություններ, սոցիալական մեդիա և քաղաքացիների մասնակցություն» խորագրով: 

Դասընթացին մասնակցում էին Հայաստանի 30 համայնքի ՏԻՄ աշխատակիցները, մասնավորապես՝ համայնքների հանրային կապերի պատասխանատուներն ու մամուլի քարտուղարները, աշխատակազմի քարտուղարները և հանրային կապերի գործառույթներն իրականացնող աշխատակիցները։ «Արդեն երեք տարի շարունակ իրականացնում ենք ՏԻՄ-երի աշխատակիցների վերապատրաստումներ տվյալ թեմաների վերաբերյալ՝ հաշվի առնելով համայնքների միավորումից հետո բոլոր այն անհրաժեշտ ոլորտները, որոնք կնպաստեն համայնքների պաշտոնական կայքն ու սոցիալական մեդիայի էջերը գրագետ վարելուն, ՏԻՄ-քաղաքացի երկկողմանի հաղորդակցությունը, հաշվետվողականությունն ու մասնակցայնությունն ապահովելուն: Երեք տարի առաջ միայն մի քանի համայնքում կար մամուլի քարտուղարի կամ հանրային կապերի պատասխանատուի հաստիք, իսկ այսօր գրեթե բոլոր համայնքներում էլ աշխատում են ոլորտի պատասպանատուներ կամ գործառույթն իրականացնող աշխատակիցներ, ում պետք է զինել նոր գիտելիքով ու գործիքակազմով»,- ասում է ԳՄՀԸ կողմից իրականացվող «Լավ կառավարում հանուն տեղական զարգացման Հարավային Կովկասում» ծրագրի խորհրդատու Լիկա Մկրտչյանը: 

Աշխատանքային գործունեության կատարելագործմանն ուղղված վերապատրաստման ընթացքում մասնակիցները ամրապնդեցին նյութ գրելու սկզբունքների մասին գիտելիքը, խոսեցին հանրային հաղորդակցման համայնքային առանձնահատկություններից, ուսումնասիրեցին «Տեղեկատվության ազատության մասին» օրենքի որոշ դրույթներ, գործնական վարժանքների միջոցով ծանոթանացան ճգնաժամային հաղորդակցության միջազգային փորձին և սեփական համայնքների օրինակով ստեղծեցին հակաճգնաժամային հաղորդակցման պլան։ 

Դասընթացավարները ուսումնասիրեցին և վերլուծեցին համայնքների պաշտոնական կայքերն ու սոցիալական մեդիայի էջերը, քննարկեցին մարզային և հանրապետական ԶԼՄ-ների և Տարածքային կառավարման և ենթակառուցվածքների հասարակայնության հետ կապերի վարչության հետ համագործակցության հնարավորությունները և ներկայացրեցին առաջարկներ՝ ինչպես առավել գրագետ վարել էջերը՝ ապահովելու երկկողմ հաղորդակցություն ու մասնակցայնություն: Մասնակիցները դասընթացավարների օգնությամբ որոշ համայնքների կատարողականների վերլուծության հիման վրա ուսումնասիրեցին համայնքային հաջողության պատմությունների ներկայացման մոդելները, քաղաքացիների հետ հաղորդակցվելու հնարավոր խողովակներն ու միջոցները: «Համայնքների միավորման և գործառույթների ապակենտրոնացման, ժողովրդավար կառավարման պատասխանատուն են նաև մամուլի քարտուղարները և որակյալ մամուլը, ովքեր ապահովում են Տեղական ինքնակառավարման մարմինների և բնակիչների փոխհարաբերությունը, գրագետ հաղորդակցությունը և բնակիչների մասնակցությունը տեղական ժողովրդավարությանը։ Շնորհակալություն նախաձեռնող թիմին, ովքեր կայուն զարգացման համատեքստում կարևորում են մամուլի խոսնակի ինստիտուտի կայացումը»,- ասում է Բաղրամյան միավորված համայնքի Քարտուղարության, անձնակազմի կառավարման և տեղեկատվական տեխնոլոգիաների բաժնի պետ Հովհաննես Հարությունյանը։ 

Դասընթացը վարում էին ոլորտի առաջատար մասնագետներ՝ ՀՀ ԱԺ նախագահի մամուլի խոսնակ բ.գ.թ. Ծովինար Խաչատրյանը, ՀՀ ԱԺ նախագահի խորհրդական Հովհաննես Նալբանդյանը, Ինկուբ մարքեթինգ բիզնես ինկուբատորի համահիմնադիր Մարիաննա Քաբաբյանը և ԳՄՀԸ խորհրդատու Լիկա Մկրտչյանը: 

Անդրադառնալով դասընթացների արդյունավետությանը՝ դասընթացավար, Ազգային Ժողովի նախագահի մամուլի քարտուղար բ.գ.թ. Ծովինար Խաչատրյանը նշեց. «Համայնքապետարանհներում , ինչպես ցույց է տալիս վիճակագրությունը, լրատվական հարցերով պատասխանատուները մեծ մասամբ հանրային հաղորդակցման կամ լրագրողական կրթություն և ոլորտային փորձ չունեն: Այդ պատճառով հաճախ խնդիրներ են առաջանում ոչ միայն կայքի և սոցցանցերի գրագետ վարման, այլև լրատվամիջոցների հետ աշխատանքի հարցում: Վերապատրաստման դասընթացներն այս իմաստով բավական կարևոր և արդյունավետ են, դրանք օգնում են ներկայացնել մասնագիտական հմտության գաղտնիքները և բազային գիտելիքներ հաղորդել պատասխանատու աշխատանքն առավել որակով իրականացնելու համար»: 

«Լավ կառավարում հանուն տեղական զարգացման Հարավային Կովկասում» ծրագիրն իրականացվում է Գերմանիայի միջազգային համագործակցության ընկերության (ԳՄՀԸ/GIZ) կողմից՝ Գերմանիայի տնտեսական համագործակցության և զարգացման դաշնային նախարարության և Շվեյցարիայի զարգացման և համագործակցության գործակալության (ՇԶՀԳ) ցուցաբերած աջակցության շնորհիվ: Ծրագիրն իրականացվում է Տարածքային կառավարման և ենթակառուցվածքների նախարարության հետ համատեղ: