ՀՀ ՏԿԵՆ ավիացիոն պատահարների և լուրջ միջադեպերի քննության բաժինը և Միացյալ ավիացիոն իշխանությունների ուսումնական կենտրոնը (JAA TO) ստորագրել են փոխըմբռնման հուշագիր

ՀՀ տարածքային կառավարման և ենթակառուցվածքների նախարարության ավիացիոն պատահարների և լուրջ միջադեպերի քննության բաժինը և Միացյալ ավիացիոն իշխանությունների ուսումնական կենտրոնը (JAA TO) դեկտեմբերի 10-ին ստորագրել են փոխըմբռնման հուշագիր։ 

Այս համագործակցությունը հատկապես կարևոր է մասնագիտական կարողությունների զարգացման ու հզորացման տեսանկյունից։ JAA TO-ն ունի 50 տարվա փորձ ավիացիոն իշխանություններին և կազմակերպություններին ուսուցանելու՝ ավիացիոն ոլորտի կանոնակարգման և անվտանգության պահանջների վերաբերյալ։ 

JAA TO-ն Եվրոպայում Քաղաքացիական ավիացիայի միջազգային կազմակերպության (ԻԿԱՕ) կողմից ճանաչված միակ կազմակերպությունն է, որը ստացել է «Գերազանցության ուսումնական կենտրոն՝ Պլատին» (Training Centre of Excellence – Platinum, TCE) կոչումը և հանդիսանում է ԵԱՍԱ Վիրտուալ ակադեմիայի (EASA Virtual Academy, EVA) առաջատար անդամներից մեկը։ 

Համագործակցությունը նաև նպաստում է ՀՀ կառավարության 2021-2026 թվականների գործունեության միջոցառումների ծրագրի 75-րդ կետի իրականացմանը՝ ուժեղացնել ավիացիոն պատահարների և լուրջ միջադեպերի պետական մասնագիտական քննության անցկացման լիազորված մարմնի ինստիտուցիոնալ կարողությունները և միջազգային ստանդարտներին համապատասխանությունը։