ՏԿԵՆ-ի նախաձեռնությամբ ՀՀ պետական կառավարման ակադեմիայի կողմից կիրականացվի համայնքային ծառայողների և ՏԻՄ ներկայացուցիչների վերապատրաստում

ՀՀ տարածքային կառավարման և ենթակառուցվածքների նախարարության նախաձեռնությամբ ՀՀ պետական կառավարման ակադեմիայի կողմից 2024 թվականին նախատեսվում է իրականացնել ՀՀ մարզերի թվով 700 համայնքային ծառայողների և տեղական ինքնակառավարման մարմինների թվով 300 ներկայացուցիչների վերապատրաստում։ 

Վերապատրաստման արդյունքում ակնկալվում է կատարելագործել համայնքային ծառայողների մասնագիտական գիտելիքներն ու հմտությունները, ինչպես նաև զարգացնել տեղական ինքնակառավարման մարմինների ներկայացուցիչների կարողությունները։ Սույն թվականի մայիսի 6-ին մեկնարկել է ՀՀ Սյունիքի մարզի տեղական ինքնակառավարման մարմինների ներկայացուցիչների վերապատրաստման գործընթացը։ 

Մայիսի 6-ից 8-ը կազմակերպված դասընթացին մասնակցել են Կապան համայնքի ղեկավարի տեղակալներն ու ավագանու անդամները: Համայնքային ծառայողների վերապատրաստումը մեկնարկել է մայիսի 13-ին։ 

Մայիսի 13-ից 23-ը կազմակերպված դասընթացին մասնակցել են ՀՀ Արմավիրի մարզի թվով 40 համայնքային ծառայողներ: Ներկայումս ընթանում են ՀՀ Կոտայքի և Արմավիրի մարզի թվով 80 համայնքային ծառայողների վերապատրաստման դասընթացները ՀՀ Արմավիրի մարզի Արմավիր, ինչպես նաև ՀՀ Կոտայքի մարզի Աբովյան և Բյուրեղավան համայնքներում։

 Մայիսի 27-ին ՀՀ Կոտայքի մարզի Աբովյանի համայնքապետարանում անցկացվող դասընթացի մասնակիցներին ողջունել է ՀՀ տարածքային կառավարման և ենթակառուցվածքների նախարարության տարածքային կառավարման վարչության պետ Աննա Իվանյանը:

 Վարչության պետը պատասխանել է համայնքային ծառայողներին հետաքրքրող մի շարք հարցերի, որոնք վերաբերում էին համայնքային ծառայության մասին ՀՀ օրենսդրությամբ նախատեսված գործընթացների դիտարկման արդյունքներով բացահայտված խնդիրների լուծմանը, գործընթացներին առնչվող ընթացակարգերի հստակեցմանը, համայնքային ծառայողների կարգավիճակի բարելավմանը: