Մոնղոլիայում կայացել է ԱՃԹՆ/EITI-ի կողմից կազմակերպված «Կենտրոնական Ասիայում և Կովկասում փորձի փոխանակում և ուսուցում» խորագրով տարածաշրջանային միջոցառումը

2024 թվականի հունիսի 5-ից 7-ը Մոնղոլիայի Ուլան Բատոր քաղաքում կայացավ Արդյունահանող Ճյուղերի Թափանցիկության Նախաձեռնության (ԱՃԹՆ/EITI) միջազգային քարտուղարության կողմից կազմակերպված «Կենտրոնական Ասիայում և Կովկասում փորձի փոխանակում և ուսուցում» խորագրով տարածաշրջանային միջոցառումը, որին Հայաստանի Հանրապետությունից մասնակցում էին Տարածքային կառավարման և ենթակառուցվածքների նախարարության ընդերքի վարչության ընդերքօգտագործման ոլորտի քաղաքականության մշակման բաժնի պետի պարտականությունները կատարող Սեդա Հակոբյանը և Հայաստանի ԱՃԹՆ-ի բազմաշահառու խմբի քաղաքացիական հասարակության խմբակցության ներկայացուցիչ՝ «Համայնքային համախմբման և աջակցության կենտրոն» ՀԿ-ի ղեկավար Օլեգ Դուլգարյանը։ 

Միջոցառմանը մասնակից գործընկեր երկրների ներկայացուցիչներին առանձնակի հետաքրքրում էր Հայաստանի փորձը՝ հաշվի առնելով այն հանգամանքը, որ արդեն երկրորդ անգամ Հայաստանը վավերացման արդյունքներով ստանում է ԱՃԹՆ-ի միջազգային Խորհրդով հաստատված ամենաբարձր գնահատականը: 

Ուստի, ուսուցողական բնույթ կրող այս հանդիպմանը Հայաստանի ներկայացուցիչները տարածաշրջանի երկրների ԱՃԹՆ-ի պատասխանատուներին ներկայացրեցին Հայաստանի առաջավոր փորձը՝ ԱՃԹՆ-ի շրջանակներում իրական շահառուների ինստիտուտի ներդրման և պայմանագրերի թափանցիկության առումով։ 

Բացի դրանից, ներկայացվեց հանքարդյունաբերության ոլորտի կառավարման մարտահրավերներով և Հայաստանի ԱՃԹՆ-ի ազգային առաջնահերթություններով պայմանավորված այն գործողությունների պլանի նախագիծը, որոնք նախատեսվում են ոլորտի բարեփոխումների համար: 

Հանդիպման ավարտին ԱՃԹՆ/EITI միջազգային քարտուղարության պատասխանատուները նշեցին միջոցառման անցկացման արդյունավետությունը և փոխադարձ ուսուցման հանդիպումների շարունակականության անհրաժեշտությունը: