ՀՀ ՏԿԵ նախարար Դավիթ Խուդաթյանը այցելել և դիտարկել է «Կորեայի ձոր» տանող ճանապարհի հիմնանորոգման աշխատանքները

ՀՀ ՏԿԵ նախարար Դավիթ Խուդաթյանն այսօր Երևանի քաղաքապետ Տիգրան Ավինյանի, Կոտայքի մարզպետ Ահարոն Սահակյանի, «Ճանապարհային դեպարտամենտ» հիմնադրամի պատասխանատուների հետ այցելել և դիտարկել են «Կորեայի ձոր» տանող ճանապարհի հիմնանորոգման աշխատանքները, որոնք գրեթե ավարտական փուլում են։ 

276 մլն դրամ պայմանագրային արժեքով այս ճանապարհի հիմնանորոգման աշխատանքները մեկնարկել էին այս տարվա օգոստոսի 18-ից և գրեթե ավարտվել են։ Այս պահին իրականացվում են աշխատանքներ ճանապարհային անվտանգության էլեմենտների տեղադրման վրա։ 

Այս ճանապարհը շատ կարևոր նշանակություն ունի հատկապես քաղաքը շրջանցելու և խցանումներից բեռնաթափելու համար։ Այս հատվածում մեծ ծավալի աշխատանք է կատարվել, ճանապարհը լայնացվել է և բարեկարգվել։ 

Այնուհետև նախարարը Երևանի քաղաքապետի և մարզպետի հետ այցելել են Երևան-Աշտարակ մայրուղու Պռոշյանի բնակավայր տանող հատված։ 

Այստեղ էլ մոտ 5.02 կմ հատվածում իրականացվել է միջին նորոգման աշխատանքներ՝ մոտ 269 մլն դրամ պայմանագրային արժեքով։ Աշխատանքները 95% -ով ավարտված են։