ՀՀ ՏԿԵ նախարար Դավիթ Խուդաթյանը աշխատանքային այցով Արմավիրի մարզում էր

ՀՀ տարածքային կառավարման և ենթակառուցվածքների նախարար Դավիթ Խուդաթյանն այսօր աշխատանքային այցով Արմավիրի մարզում էր։ 

Նախարարը Արմավիրի մարզպետ Վահրամ Խաչատրյանի, համայնքապետերի, «Ճանապարհային դեպարտամենտ» հիմնադրամի տնօրեն Արկադի Չերչինյանի և ոլորտային այլ պատասխանատուների հետ ողջ օրը շրջել է մարզում և ծանոթացել պետական բյուջեի միջոցներով և սուբվենցիոն ծրագրով իրականացվող շինարարական ծրագրերի ընթացքին։ 

Նախարարի առաջին կանգառը Արմավիրի մարզի Արաքս համայնքի Ջրառատ բնակավայրն էր, որտեղ իրականացվում են ճանապարհաշինարարական աշխատանքներ։ Առհասարակ Արաքս համայնքի Ջրառատ բնակավայրում վերջին 4 տարվա ընթացքում կառուցվել է ծանրամարտի դպրոց, նոր ճանապարհ, 10 կմ ջրագիծ, գազամատակարարման ցանց, հիմնանորոգվել է գյուղի մանկապարտեզը ու մշակույթի տունը, ընթացքի մեջ է նոր դպրոցի և բուժամբուլատորիայի կառուցումը։ 

Նախարարն այցելել է նաև Էջմիածին, որտեղ նորոգվում են Հովհաննես Թումանյան, Ռաֆայել Պատկանյան, Սոս Մանուկյան և Բաղրամյան փողոցները. ծրագրի շրջանակում նախատեսված են ասֆալտբետոնե ծածկի տեղադրում և կոյուղային համակարգի վերակառուցում։ 

Այց կատարվեց նաև Շահումյան բնակավայր, որտեղ շարունակվում է Մ-3 միջպետական ավտոճանապարհի՝ Էջմիածին–Շահումյան–Աշտարակ ուղղությամբ մոտ 4.8 կմ երկարությամբ հատվածի հիմնանորոգման աշխատանքները։ 

Ներկա փուլում կատարվում են հողային աշխատանքներ, տեղադրվում են եզրաքարեր և կառուցվում են ջրահեռացման համակարգեր։ 

Ծրագիրն իրականացվում է ՀՀ պետական բյուջեի միջոցներով, ընդհանուր արժեքը կազմում է 1 մլրդ 130 մլն դրամ։ 

Նախարար Խուդաթյանը դիտարկել է նաև Արմավիրի մարզի Փարաքար -Մերձավան -Այգեկ - Բաղրամյան - Նորակերտ ճանապարհի հիմնանորոգման աշխատանքները։ 

Տեղում տրվել են մի շարք հանձնարարականներ։