ՏԿԵ նախարարության, ՄԱԿ-ի զարգացման ծրագրի (ՄԱԶԾ) և ՄԱԿ-ի Եվրոպական տնտեսական հանձնաժողովի (UNECE) համատեղ կազմակերպմամբ անցկացվում են «Hard talk» քննարկումները

Ապրիլի 16-17-ը Երևանում Տարածքային կառավարման և ենթակառուցվածքների նախարարության, ՄԱԿ-ի զարգացման ծրագրի (ՄԱԶԾ) և ՄԱԿ-ի Եվրոպական տնտեսական հանձնաժողովի (UNECE) համատեղ կազմակերպմամբ անցկացվում են «Hard talk» քննարկումները՝ վերականգնվող էներգետիկայի և շենքերում էներգաարդյունավետ արդիականացման ֆինանսավորման թեմայով։ 

Միջոցառմանը բացման խոսքով հանդես է եկել Տարածքային կառավարման և ենթակառուցվածքների նախարարի տեղակալ Նարեկ Ապիտոնյանը։ Նա ընդգծել է, որ ՀՀ-ի համար վերականգնվող էներգետիկայի զարգացումը ոչ միայն շրջակա միջավայրի պահպանության հարց է, այլև տնտեսության աճի, էներգետիկ անվտանգության և բնակչության բարեկեցության կարևոր բաղադրիչ։ 

«Շենքերի էներգաարդյունավետության բարելավումը մեր առաջնահերթություններից է, միևնույն ժամանակ այս ոլորտը մեծ ներուժ ունի մասնավոր ներդրումների ներգրավման և նոր աշխատատեղերի ստեղծման հարցում։ Մենք կարևորում ենք նման հարթակների դերը, որտեղ պետական մարմինները, մասնավոր հատվածը, միջազգային գործընկերներն ու փորձագետները կարող են բաց և կառուցողական երկխոսության միջոցով համատեղ ձևակերպել լուծումներ և առաջնահերթություններ»,-ասել է Ապիտոնյանը։ 

Բացման խոսքով հանդես են եկել նաև ՄԱԶԾ-ԿԿՀ «Էներգաարդյունավետ շենքերի վերազինման ներդրումների ռիսկերի նվազեցում և մասշտաբների ընդլայնում» միջազգային ծրագրի ղեկավար Ռուսուդան Թուշուրին և ՄԱԿ ԵՏՀ էներգետիկայի տարածաշրջանային խորհրդական Օլեգ Ձյուբինսկին։ Միջոցառման երկրորդ հատվածում տեղի է ունեցել պանելային քննարկում՝ «Շենքերում էներգաարդյունավետ վերազինման ֆինանսավորում թեմայով», որին հաջորդել է Բարձր մակարդակի քննարկում՝ «վերականգնվող էներգետիկայի ներկա վիճակը, հեռանկարները, խոչընդոտները և լուծման ուղիները՝ ինստիտուցիոնալ, քաղաքական և կարգավորող խոչընդոտներ» խորագրով։ 

«Hard Talks» քննարկումները նպաստում են երկրներում պահանջարկահեն բանավեճի ձևավորմանը՝ ուղղված այն փոփոխությունների հստակեցմանը, որոնք անհրաժեշտ են մասնավոր հատվածի կողմից կայուն էներգետիկայի ոլորտում ներդրումների իրականացման համար։ Էներգետիկ ոլորտի հիմնական դերակատարները հնարավորություն են ստանում քննարկելու առանցքային հարցերը, սահմանելու առաջնահերթությունները և ներկայացնելու քաղաքականության փոփոխությունների վերաբերյալ կոնկրետ առաջարկություններ, որոնք անհրաժեշտ են քաղաքական, իրավական, կարգավորող և տեխնիկական խոչընդոտների հաղթահարման, ինչպես նաև վերականգնվող էներգիայի չօգտագործված ներուժի իրացման համար։ 

Աշխատաժողովը կշարունակվի նաև ապրիլի 17-ին՝ «Հայաստանում վերականգնվող էներգետիկայի խթանման առաջնահերթ գործողությունների շուրջ» թեմայով։